طريقة عمل الكنافة العثمانلي بالبندق والعسل والعثمانلي المحشية بالكريمة الباستري والمكسرات
خطوة بخطوة طريقة عمل الكنافة العثمانلي بالبندق والعسل النحل وأيضا طريقة عمل الكنافة العثمانلي المحشية بالكريمة الباستري والمكسرات.
المكونات
- كنافة بصمة أو كنافة بورمة مقطعة
- سمن
- عسل نحل
- بندق
- كريمة باسترى
- مكسرات حسب الرغبة
طريقة عمل الكنافة العثمانلي بالبندق والعسل النحل
- نجيب الكنافة البصمة ونبصمها يعني نقطعها ، لو مفيش كنافة بصمة (أو حبيت استخدم الكنافة البورمة) مش مشكلة ، اجيب الكنافة البورمة المتوفرة عندي أدعكها كأنها فم غسيل ، ودا هيسلكها من بعضها ويخليها تتفكك ، و هبتدي ابصمها يعني همسك الكنافة وابتدي اقطعها
- اخد الكنافة اللي قطعتها واحطها في صينية ، واخد عليها شوية سمن واوزع السمنه عليها كلها ،وافرشها في الصينية (ممكن استخدم زيت ذرة بدل السمن)
- ادخل الصينية الفرن حوالي من ربع الي ثلت ساعة هتطلع عندي وتكون خدت اللون الذهبي
- بعد ماتهدي افركها واكسرها حتت متساوية
- في اناء اجيب شوية كنافة ذهبية واضيف عليها عسل نحل (لو معنديش استخدم شربات تقيل) ، واقلب حتي تلزق كل مجموعة كنافة وتكون كتل
- اجيب اناء تاني واحط فيه شوية بندق (البندق حمصته وقشرته) ،واضيف عليه شوية عسل نحل ، واقلب حتي يدهن بالعسل تماما
- ثم اجيب الصينية وافرد فيها كيس وابطن الصينية بالكيس ويكون اكبر من الصينية ، وادهن الكيس بزيت الذرة من الداخل
- بعد ذلك احط البندق في الصينية وادوس عليه بحيث يتفرد ويبقي عندي طبقة بندق كاملة مغطية الصينية كلها
- بعد كدا اجيب الكنافة اللي اديتها عسل نحل هلاقيها جمعت معايا ولزقت في بعض ، وابتدي اوزعها فوق البندق واملى الفراغات كلها في الصينية ، واضغط بايدي عليها واساوي ، وبعدين اقفل الكيس عليها واضغط بقطاعة او صينية تانية
- ادخلها الفريزر لمدة 10 دقائق فقط
- اقلبها علي طبق التقديم
ملحوظة :
في ناس بتحط الكنافة في الفريزر علشان يبصموها ودا غلط لان عيب الفريزر انه بيخليها تتكسر وتبقي مفرفته ولو اتكسرت وفرفتت وفتفتت مش هتمسك معايا وهتفك واحنا عايزين الكنافة تكون ليها فتل تمسك معانا في الحشو .
طريقة عمل الكنافة العثمانلي المحشية بالكريمة الباستري والمكسرات والكريز أو أي فاكهة :
- اجيب صواني او قوالب الكب كيك واضع بها كيس واقوم بدهنه من الداخل بزيت الذرة
- اجيب الكنافة العثمانلي التي جهزتها سابقا بعسل النحل، وافردها داخل القوالب، واكبسها جيدا ، واترك حفرة في قلبها لوضع الحشوة
- اضع ملعقة من الكريمة وحبة مكسرات او حبة كريز
- اضيف طبقة كنافة واغلق الكيس واضغط عليها
- ادخلها الفريزر لمدة 10 دقائق فقط
- اقلبها علي طبق التقديم واقسمها نصفين بسكية حادة ليبرز جمال الحشوة
مكونات تحضير كريمة باسترى البودرة وافكار حلوة لتغيير حشوة الكريمة الي كريمة مانجة او فراولة او النكهة المفضلة لديكي :
- 150 جم كريمة بودرة
- 250 جم ماء أو لبن ( هنا نقدر نغير النكهة للكريمة مثلا لو عايزين الكنافة بحشوة المانجة 250 جم عصير مانجو لو بحشوة الفرولة يبقي 250 جم فراولة ، ممكن نستخدم 250 جم زبادي ودا بيدي الحشوة طعم مذاذة )
طريقة تحضير كريمة باسترى لحشو الكنافة العثمانلي:
في اناء اضيف الكريمة البودرة واللبن واضرب خفيف هلاقيها ربطت معايا علي طول اخليها بس ماسكة شوية يعني تبقي كريمة شبه الشانتيه ماتكونش طرية .
الكريمة الباسترى ميزتها انها مش محتاجة تضرب كتير بتربط وتتكون بسرعة ، وكذلك نقدر نغير بيها طعم الحشوة زي ما قلت قبل كدا لو عايزة الكريمة محشية مانجة نضيف عصير مانجة بدل اللبن أو المية ، ومكن تبقي الحشوة بالفراولة او اي نكهة تحبيها ممكن مثلا تبقي الحشوة بقمر الدين وهكذا .
مكونات عمل الشربات أو السيرب التقيل ( اذا لم يكن لديكي عسل نحل ) :
- 3 كوب سكر
- 2 كوب ماء
- نصف ليمونة
- 1 كيس فانيليا
طريقة عمل الشربات أو السيرب الثقيل :
- ضعي 3 كوب سكر مع 2 كوب ماء علي النار حتي يذوب السكر ويبدأ الغليان
- ثم اضيفي عصير نصف الليمونة ، واتركي الخليط يغلي لمدة 5 دقائق
- ارفعيه من على النار و بعد ان يهدأ الخليط ويصبح دافئ اضيفي الفانيليا وقلبيها جيدا
- اتركي الشربات يبرد تماما قبل استخدامه.
بالصحة والهنا ،،
